Anna Rancāne: Latvīšam ceļuošonys viruss ir stypruoks par koronavirusu!

27. aprīlis ir Latgales Kongresa diena. Tai par godu uzrunājām nopelniem bagāto Latgales dzejnieci Annu Rancāni un lūdzām atklāt savu šī brīža sajūtu - protams, latgaliešu valodā!

Vasali Latgolā!

Ar itīm vuordim es jau 9. maja reitā byutu uzrunuojuse turistus nu ceļuojumu agenturys "Impro". Mes byutu divejis skaistys pavasara dīnys kūpeigi svietiejuši dzeivi kruošņajā Dīnvydlatgolā, Preiļūs, Aglyunā, Dagdā i Ondrupinī, gasteitu pi taidim ļaudim, par kurim Latgolā soka – jī ir ļauds ar cymusu! Latviski tū varātu saukt – "ar šarmu"! Āduši da seita Aglyunys Vijis captū maizeiti i Ondrupinis saimineicu vuoreitū putru, Latgolys špeku, sīru i kļockys, ībaudiejuši šmakovceni deļ ocu gaišuma, dzīduojuši nu sirds leidza ar "Sovvaļnīkim", klausiejušīs laksteigolys Lūznovys muižas parkā, apbreinuojušs pūdus, bļūdys i madaunīkus pi Aivara i Vēsmys Ušpelim. Gaišajā maja vokorā apsastuotu pi Latgolys jiurys – Rāznys azara, lai pasavārtu juo skaidrajā spīgelī. Izstaiguotu pa Rēzekni i apbreinuotu juos klusū skaistumu, i dareitu i pīdzeivuotu vēļ i vēļ vysaidys lītys, kū var pīdzeivuot tikai i vīneigi ceļā...

Bet - 9.-10. majā muni turisti byus kotrs sovā sātā, i es ari pyrmū reizi piec pīcpadsmit skaistom, namīreigom turisma vosorom pyrmū reizi eisti nazynuošu, kod otkon variešu īkuopt autobusā, pajimt rūkā mikrofonu i redzēt ceļuotuoju  acis – prīceigys, gaidūšys, Latgolu i juos breinumus redzēt grybūšys i praseigys.  Dīvamžāļ, itūšaļti mes vysi pasaulē jiutamēs kai īslāgti četruos sīnuos, nabreiveibā, kai aiz augstim cītuma myurim, kai aiz dzeļža aizkorim. Turisms, taipat kai pasažīru satiksme i kulturys pasuokumu reikuošona ir tuos nūzaris, kū pandemejis radeituo krize ir skuoruse vyssmoguok, jo – navarom nikuo dareit sovys i cytu drūšeibys dieļ.

Itys laiks liks myusim daudzi kū puordūmuot, kai pīduovuot ceļuotuojim aizraujūšus, interesantus, atraktivus i, golvonais, ari drūšus maršrutus i objektus. Varbyut paliks i izdzeivuos stypruokī, drūšuokī i atjauteiguokī tūrisma pīduovuojumi, tī, kuri muoceis pīsamāruot, puorsaveiduot, puortapt, īvāruot vysys, tamā skaitā, daudzi stingruokys higienys praseibys, kuri nanūlaiss zamuok kvalitatis lateņu, tok paliks tikpat sirsneigi i ceļuotuojus gaidūši.

Gryuši gon pasaceit, voi šūvosor vareis starteit lelī turisma autobusi, pylni ar ceļuotuojim, kur navar nūdrūšynuot divu metru distaņci, varbyut byus juopuorīt iz mozuoku grupu, ari vīnys saimis braucīnim. Tys byutu žāl. Bet byus vēļ cytys syltuos vosorys, gaišī pavasari i zalta rudini!  

Ceļuotgribietuoji nikur napaliks, jo latvīšam ceļuošonys viruss ir stypruoks par koronavirusu! Ja ari kaidu laiku uorzemis byus aizslāgtys i atslāga byus nūlauzta, tok tys byus laiks, lai apceļuotu i īpazeitu sovu zemeiti. Es poša seņ kai turiste naasu apbraukuojuse Kūrzemi i Vidzemi, Sēliju i Zemgali, bet zynu, ka maņ ir juosagaida gosti Latgolā.

I mes vēļ apceļuosim Daugovys lūkus, apbreinuosim nūslāpumainū Latgolys Italeju – Kruoslovu i Pīdruju, vītys, par kurom skaistuokys vysā Latvejā gryuši atrast. Ēssim Lubuona zivu zupu i ķersim Macānu Juoņa natycamūs stuostus Īdeņā aba Iudiņu solā. Apceļuosim skaistūs Latgolys mozūs dīvnomus – Sarkaņus i Piļcini, Indricu i Pušu, kur tai vīn ruodīs, ka Dīvs tī ir tyvuok tev paguojis i apsasieds iz slīkšņa sūpluok. Kuģuosim na ar prāmi, bet ar plūstim i laiveņom. Izzynuosim Latgolys viesturi, īpazeisim senejūs omotus, izstaiguosim Latgolys rakstnīku stygys. Maizis, sīra i vēļ kuo naviņ cyta deļ gostu Latgolā vysod byus gona! Varbyut pavaicuosim vēļ naīpazeitys vītys, taidys, kur ceļuotuoju autobusi pīstuoj rešuok. Zynit, kur pa munam ir vysskaistuokuo vīta Latgolā? Voi jius asat kod naviņ izkuopušs Keišu voi Šalupinku piļskolnā? Ak, nazynit, kur jis ir? Nu tod – brauksim, lai radzātu!

Anna Rancāne

KOMENTĀRI

(vārds) Ieraksti rezultātu

SADAļU ATBALSTA:

 
Ceļojumu un atpūtas piedāvājumi:
Atpūtas un ceļojumu piedāvājumi 26.03.2024 - 31.03.2024 Liepājas restorānu nedēļa Liepājas reģiona TIB
Liepājas restorānu nedēļa norisināsies desmit dienas, divas nedēļas nogales – no 12. līdz 21. aprīlim un tajā piedalīsies 23 Liepājas | Skatīt vairāk
Pilna Servisa Līzings Passat Europcar
Pilna Servisa Līzinga piedāvājums VW Passat Variant MY24 Elegance. | Skatīt vairāk
Atpūtas un ceļojumu piedāvājumi 22.03.2024 - 03.04.2024 LIELDIENU IZPĀRDOŠANA Novatours
Ķer savu ceļojumu ar izdevīgu cenu! Ceļo ar ģimeni vai draugiem un saņem atlaidi! | Skatīt vairāk
Laipni lūgti Šrilankā – smaidu valstī! Latvia Tours
Debesskrāpji un koloniālā stila savrupmājas, lielveikali un ielu tirdziņi, krāšņi Rietumu modes apģērbi un tradicionālās sarongas, ātri sporta | Skatīt vairāk
no 757 EUR

Par mums / about us | Ētikas kodekss | Reklāma un Sadarbība | Kontakti | Autortiesības | Partneriem
All rights reserved © 2002 - 2024 BalticTravelnews.com | Design & maintenance © 2000 - 2024 1st-studio.com

 
Total Timed::0.46444297sec.