Dzejnīks, rakstnīks, folklorists, nūvodpietnīks i muokslinīks Ontons Slišāns ir zīmas saulgrīžu bārns, dzims 28. decembrī, bet vuordadīnu svieteja 18. janvarī. Itys laiks Ontonam beja rodūšais laiks, kod jis sovu aktivū darbeibu veļteja Zīmeļlatgolai. Raudzeisim sajust Ontona Slišāna goru – pīsadolūt rodūšūs dorbu konkursā.
Mierkis: aplīcynuot pīdareibu i mīleisteibu sovam dzymtajam nūvodam i styprynuot latgaliskū kulturidentitati.
Reklāma
Organizators: Namaterialuos kulturas montuojuma centrs „Upīte”.
Daleibnīki: Latgolys nūvoda školu školāni i pīaugušī.
Nūtikšonas laiks: 2021. goda 13. decembris – 2022. goda 10. janvars.
Konkursa īdvesmas olūts: Ontona Slišāna dzejūļs:
KOTRU GODU
Kotru godu kaids breinums nūteik.
Div teleišus gūteņa atnas.
Treis jiereņi vuškeņai atskrīn.
Visteņa ūlu bez čaulas izdiej.
Zam ūzula zeiļu pībierst kai dečs.
Vacyns puorstuoj peipiet i olu dzert.
Māmeņa seņgaideitu duovonu nūpierk.
Tieteits nu tierga jaunu mašynu atdzan.
Naktī dabasūs kometu radzu.
Sapynā dīnvydu jyuruos maunu.
Kotru godu kaids breinums nūteik –
I es tuo breinuma gaidu.
Konkursa aizdavumi daleibnīkim:
Kotru godu kaids breinums nūteik…
1. Rodūšīs dorbs (eseja, miniatura, puosoka i tt. dorbu var raksteit gon latvīšu litaratajā, gon latgalīšu rokstu volūdā – pareizraksteiba natiks viertēta) – puordūmas par breinumu, par naparostuom, bet gaidietuom lītuom, paruodeibuom, sajiutuom, īpaši prīcuosimēs par puosokom;
vacuma grupas:
a. Leidz 5 godu vacumama (dorbu var īsnēgt rūkrokstā, dorba lelums 0,5 A4 formata lopa)
b. 6 – 9 godi (dorbu var īsnēgt rūkrokstā, dorba lelums 1 A4 formata lopa)
c. 10 – 12 godi (dorbu īsnādz datorrokstā, dorba lelums 1 A4 formata lopa)
d. 13 – 15 godi (dorbu īsnādz datorrokstā, dorba lelums 2 A4 formata lopas)
e. 16 – 18 godi (dorbu īsnādz datorrokstā, dorba lelums 3 A4 formata lopa)
f. Pīaugušī 19+ (dorbu īsnādz datorrokstā, dorba lelums vaira par 3 A4 formata lopom)
2. Zeimiejumu konkurss “Kotru godu kaids breinums nūteik…” Dorbu formats A3 lopa gleznīceibas (guaša, akvareli, eļļas kreitini) tehnikā.
vacuma grupas:
a) Leidz 5 godu vacumam
b) 6 – 9 godi
c) 10 – 12 godi
d) 13 – 15 godi
e) 16 – 18 godi
f) Pīaugušī 19+
Svarīgi: Kotrys daleibnīks var pīsadaleit obejūs konkursūs voi tikai rodūšūs dorbu, voi zeimiejumu konkursā. Kotrys daleibnīks var īsnēgt naīrūbežuotu skaitu sovu dorbu. Vusi īsnāgtī dorbi palīk Upītes muzeja fondūs.
Dorbi juoīsnādz da 2022. goda 10. janvaram, vīnā nu sev ārtuokūs veidu:
1. Syutūt pa postu: „Rodūšūs dorbu konkurss” Namaterialuos kulturas montuojuma centrs „Upīte”, Akas laukums 1, Upīte, Škilbānu pogosts, Bolvu nūvods, LV-4587
2. Rodūšū dorbu var īsnēgt ari, syutūt iz e-postu: upites.muzejs@gmail.com
3. Upītes bibliotekā, Akas laukums 1, Upīte, Škilbānu pogosts, Bolvu nūvods. Nu ūtardīnes leidz sastdīnei, bibliotekas dorbalaikā.
4. Var izmontuot kuodu nu pakomatīm – Omniva, DPD voi Vinipak, ar sanimšonas vītu Bolvu pylsāta, saniemieju nuruodeit – Andris Slišāns, m.t. 29621058.
Dorbam juodavīnoj:
1. Rodūšejam dorbam pādejā lopaspusie, zeimiejuma ūtrejā pusie konkursanta Vuords Pavuorde, vacums, muoceibu īstuode voj nūsadorbuošona, školuotuoja/konsultanta Vuords Pavuorde, kontattelepons, e-posts. (daleibnīks snādz iz sevi attīcynojamuos viests).
2. Aizpildeits pīteikums, kas pīvīnuots pi nūlykuma – īsnādzams tikai elektroniski, syutūt iz e-postu: upites.muzejs@gmail.com
Nūslāguma pasuokums i uzvarātuoju apbolvuošona 2022. goda 18. janvarī Upītē.
Kontakti: Naskaidreibu gadejumā zvaneit voj raksteit whatsapp: Andris Slišāns 29621058 voi Ligitai Spridzānei 29868786, voi raksteit upites.muzejs@gmail.com.
