Foto: Latgolys Studentu centrs
Autors: Ilze Sperga
Avots: Latgolys Studentu centrs
Par speiti krīzei bīdreiba “Latgolys Studentu centrs” ir izdavuse gruomotu „Es soku. Tu soki. Puosokys par krīzi”, kurā apkūpotys skaistuokuos latgalīšu literaruos i tautys puosokys, dereigi padūmi lātai saimnīkuošonai i sliminīku lečiešonai, roksti par vacajom krīzem i anekdoti par myusu laiku Latveju i vaļdeibu, myusu dīnu jaunīšu raksteitī stuosti ar laimeigom beigom. Gruomotā sūpluok Dīvam, smutam, zalta putynam, veiksmis blusai i gudrajam zyrgam par puosoku tālim palykuši i Aija Kinca, Gatis Suhoveckis, Māris Grigaļs, Ivars Gūdmaņs, Mihaels Šūmahers (Michael Schumacher), i Ministru prezidents, krīze i pat Latvejis hokeja fani.
Puosoku gruomotys atsīšona Reigā nūtiks itū pīktdiņ, 27. majā, 12:45 stuņdēs Strieļnīku īlā 9, gruzinu veina veikalā “JasaCAFE”, dreiž piec tam, kod sābrūs, Strieļnīku īlā 4, sovu gruomatu "Kai Latveja tyka puori finanšu krīzei" ("Kā Latvija pārvarēja finanšu krīzi") prezentēs Ministru prezidents Valdis Dombrovskis i storptautisku atzineibu īgivušais ekonomists Anders Aslunds, a Rēzeknē ar gruomotu varēs īsapazeit pyrmūdiņ, 30. majā 16:00 stuņdēs Atbreivuošonys alejā 90, Rēzeknis Augstškolā LgSC organizeituos Latgalīšu piecpušdīnis laikā.
Reklāma
Stuosti par krīzi i juos puorvariešonu ir tik puosokys. Vysys puosokys ir stuosti par krīzi.
Puosokuos kai i dzeivē varūnim saīt puordzeivuot vysaidys krīzis - vacuma pūsmu i psihologiskuos, ekonomiskuos i attīceibu krīzis, tok puosoku varūni, puorvarūt napatikšonys, teik stypruoki i atdzymst jaunā, lobuokā veidā.
„Stypruok par ekonomiskū krīzi cārt viņ goreiguo krīze. Gruomota roduos, kab pasasmītu par krīzi, kab bādai paruodeitu juos vītu. Kotra puosoka ir stuosts par krīzi. Puosokuos vyss ir kai dzeivē: suokumā vyss brīsmeigi, pa vydu daudz dorba, a beiguos vyss otkon ir labi. Kab nabejs lelūs bādu, ni trešais tāva dāls pedeleits, ni buorineite naizītu nu sātys i myužam palyktu duraki. Tok vysys puosokys ir par krīzis puorvariešonu. Vysom puosokom ir laimeigys beigys,” stuosta gruomotys redaktore Ilze Sperga.
Gruomotā īlyktī literarī i viesturiskī teksti, padūmi i 20. g. s. pyrmajā pusē radeituo publicistika ir aicynuojums apsazynuot sovys saknis, seņču gudreibu i pajimt jū leidza globalizātajā pasaulī. Krīzis īt i aizīt. Teksti palīk.
Gruomota „Es soku. Tu soki. Puosokys par krīzi” sastuov nu septeņu atsevišku burtneicu, kas sasītys saineitī ar eistu sovetskūs laiku papeira stiči. Kotrai burtneicai ir sovs vuoks i satura ruodeituojs. Vysi teksti skaitami latgalīšu rokstu volūdā. Vīnaidojūt raksteibu atbylstūši myusu laika ortografejis normom, īspieju rūbežuos saglobuoti kai attīceiguo laika raksteibys styls i leksika, tai individualī raksteibys principi i izlūkšņu īpatneibys.
Pyrmajuos divejuos burtneicuos apkūpuotys latgalīšu tautys puosokys, kas salaseitys 19. i 20. g. s., trešajā i catūrtajā Marijis Andžānis, Fraņča Trasuna, Naaizmierstulis, Ontona Slišāna, Valentina Lukaševiča, Joņa Ryučāna un citu latgalīšu autoru literaruos puosokys, pīktajā – myusdīnu bārnu i jaunīšu stuosti ar laimeigom beiguom, kas nu vysys Latvejis salaseiti sadarbeibā ar LNB Bārnu literaturys centru, sastajā – 20. godu symta suokuma latgalīšu presis roksti par krīzi i myusu dīnu anekdoti par Latveju i politikim, septeitajā – fragmenti nu latgalīšu rūkroksta literaturys radzamuokus viersyunis Andryva Jūrdža kruojuma „Vysaidu zuoļu gruomota”.
Gruomotys „Es soku. Tu soki. Puosokys par krīzi” izdeviejs ir bīdreiba "Latgolys Studentu centrs". Idejis autoris Marita Papiņa i Ilze Sperga. Gruomotys vuoka dizaina autors Aldis Aleks. Itei puosoku gruomota ir bejuse kai tolka, kur rūku dalics na vīns viņ cylvāks, tai aplīcynojūt, ka kūpā puorvarama i krīze. Izdūšonu finansiejs Vaļsts Kulturkapitala fonds.
Par rakstu pārpublicēšanas noteikumiem lūdzam kontaktēties ar Travelnews.lv redakciju.
.jpg "Ziemassvētku koncerti Mazmežotnes muižā Bauskas TIC")
