Autors: Edeite Husare
Avots: Lakuga.lv
Sastdiņ, 15. oktobrī, kod Latvejā atzeimoj Vaļsts volūdys dīnu i nūtiks par tradiceju tykušais Pasauļa diktats latvīšu volūdā, tiks pīgrīzta viereiba latvīšu volūdys rokstu tradiceju daudzveideibai i jau sastū reizi byus vareiba raksteit ari diktatu latgalīšu rokstu volūdā. Diktats skanēs Latvejis Radejis 1 eterā raidejumā “Kolnasāta” sastdīnis vokorā 18.20 stuņdēs, kai ari video formatā byus nūsaverams Sabīdryskūs medeju portalā LSM.lv, latgalīšu kulturys ziņu portalā lakuga.lv i socialajūs teiklūs. Diktatu organizej bīdreiba “LgSC”, latgalīšu kulturys ziņu portals lakuga.lv i Latvejis Radejis Latgolys studeja. Ituo gods diktatā akters Juoņs Krūņs (Jānis Kronis) skaiteis fragmentu nu rakstnīka i literaturzynuotnīka Valentina Lukaševiča esejis.
Reklāma
Vaļsts volūdys lykumā saceits, ka latgalīšu rokstu volūda ir viesturiskys latvīšu volūdys paveids i sūpluok latvīšu literarajai volūdai ir latvīšu volūdys ūtra rokstu tradiceja. Taišni izsvarūt latvīšu volūdys daudzveideibu, kotrys grybātuojs sevkurā vītā pasaulī 15. oktobrī teik aicynuots paraudzeit, kai tys ir – raksteit latgaliski. Koč ari kūpejais latgalīšu volūdys lītuotuoju skaits sasamazynoj, vys tik arviņ vaira teik pīgrīzta viereiba latgalīšu volūdys raksteit prasšonai – jau ūtrū godu nūteik pilotprojekts, kurā latgalīšu rokstu volūda teik vuiceita konkretuos Latgolys školuos, taipat itūgod bīdreiba “LgSC” reikoj bezmoksys tīšsaistis apvuiceibys interesentim, kurī gryb vuiceitīs raksteit latgaliski. Svareigs fakts myusdīnu latgalīšu rokstu volūdai – tikū septembra golā paguoja 15 godu nu 2007. goda, kod Vaļsts volūdys centrā ir apstyprynuoti myusdīnu latgalīšu rokstu volūdys pareizraksteibys nūsacejumi.
Sastais diktats latgalīšu rokstu volūdā skanēs sastdīnis, 15. oktobra, vokorā 18.20 stuņdēs latgaliskajā raidejumā “Kolnasāta” Latvejis Radejis 1 eterā, kai ari video formatā byus nūsaverams Sabīdryskūs medeju portalā LSM.lv i latgalīšu kulturys ziņu portalā lakuga.lv, taipat Latvejis Radejis Latgolys studejis i portala lakuga.lv socialūs teiklu profilūs. Diktata teksta skaiteišona itūgod uzticāta teatra trupys “KVADRIFRONS” akteram Juoņam Krūņam, kura dzymtys saknis ir Latgolā, bet diktata tekstam izvālāts fragments nu rakstnīka i literaturzynuotnīka Valentina Lukaševiča esejis. Diktatat teksts, kas sagataveits, īvārojūt 2007. godā apstyprynuotūs nūsacejumus, piec tuo nūslāguma puorbaudei byus daīmams portalūs lakuga.lv i LSM.lv.
Diktatu raksteit grybātuojim itūgod teik pīduovuota vareiba diktata tekstu raksteit ari tīšsaistē i tū īsnēgt klaidu puorbaudeišonai. Tū varēs izdareit ite: https://ej.uz/LTGdiktats. Taipat itūgod bīdreiba “LgSC” i Latvejis Radejis Latgolys studeja svātdiņ, 16. oktobrī, 16.00 stuņdēs aicynoj grybātuojus diktatu pīraksteit ari kluotīnē Rēzeknis nūvoda Lūznovys muižā. Piec diktata raksteišonys interesenti var pasakavēt i 17.00 pīsadaleit literarajuos sarunuos ar tekstilmuokslineicu i literati Anneli Slišāni. Kai ari, kab lobuok izprastu i īsavuiceitu latgalīšu rokstu volūdys nūsacejumus, kotrys teik aicynuots sekuot portala kontam @voluuda socialajā teiklā Instagram, kur kotru dīnu leidz diktatam byus publicāts kaids padūms voi interesanta informaceja par latgalīšu rokstu volūdu. Taipat vēļ arviņ ir vareiba pīsavīnuot latgalīšu rokstu volūdys tīšsaistis nūdarbeibom, kurom cyta nūdarbeiba paradzāta 11. oktobrī 19.00 stuņdēs, bet īprīškejuos daīmamys YouTube kanalā ite: https://ej.uz/LTGkursi. Septembra golā diktata reikuotuoji, popularizejūt latgalīšu volūdu jaunīšu vydā, organizēja diktata raksteišonu Rēzeknis Vaļsts 1. gimnazejā, kur ar jaunīšim sasatyka i diktatu skaiteja akters Juoņs Krūņs i jaunīšu radejis radejuma “Pīci breinumi” puorstuovi.
Diktatu latgalīšu rokstu volūdā organizej bīdreiba “LgSC”, Latgalīšu kulturys ziņu portals lakuga.lv i Latvejis Radejis Latgolys studeja, bet atbolsta Latvejis Radeja i Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
Par rakstu pārpublicēšanas noteikumiem lūdzam kontaktēties ar Travelnews.lv redakciju.
.jpg "Ziemassvētku koncerts Skaistkalnes baznīcā Bauskas TIC")
